وزیر اعظم جناب نریندر مودی 5 فروری، 2022 کو حیدر آباد کا دورہ کریں گے۔ وزیر اعظم دن میں تقریباً 2 بج کر 45 منٹ پر، حیدرآباد کے پٹن چیرو میں واقع انٹرنیشنل کراپس ریسرچ انسٹی ٹیوٹ فار دی سیمی ایرڈ ٹراپکس (آئی سی آر آئی ایس اے ٹی) کیمپس جائیں گے اور آئی سی آر آئی ایس اے ٹی کی 50 سالہ تقریبات کا آغاز کریں گے۔ شام کو تقریباً 5 بجے، وزیر اعظم حیدر آباد میں تعمیر شدہ ’اسٹیچو آف ایکویلٹی‘ قوم کو وقف کریں گے۔
اسٹیچو آف ایکویلٹی کی لمبائی 216 فٹ ہے، جسے گیارہویں صدی کے بھکتی سنت شری رامانوجاچاریہ کی یاد میں بنایا گیا ہے، جنہوں نے عقیدہ، مذہب اور نسل سمیت زندگی کے تمام شعبوں میں برابری کے تصور کو فروغ دینے کے لیے کام کیا۔ یہ مجسمہ ’پنچ لوہا‘ سے بنایا گیا ہے، جو پانچ دھاتوں کا مجموعہ ہے: سونا، چاندی، پیتل، تانبہ اور زِنک، اور یہ بیٹھی ہوئی حالت میں دنیا میں دھات سے بنے ہوئے سب سے اونچے مجسموں میں سے ایک ہے۔ اس مجسمہ کو ’بھدرا ویدی‘ نام کی ایک 54 فٹ اونچی عمارت کی بنیاد پر نصب کیا گیا ہے۔ عمارت کی مختلف منزلوں پر ویدک ڈیجیٹل لائبریری اور تحقیقی مرکز، قدیم ہندوستانی متن، ایک تھیٹر اور ایک تعلیمی گلیارہ ہے، جس میں شری رامانوجاچاریہ کی مختلف تخلیقوں کی تفصیلات موجود ہیں۔ اس مجسمہ کے تخلیق کار شری رامانوجاچاریہ آشرم کے شری چنّا جی یار سوامی ہیں۔
پروگرام کے دوران، شری رامانوجاچاریہ کی حیات و تعلیمات پر مبنی 3 ڈی پریزنٹیشن میپنگ بھی دکھائی جائے گی۔ وزیر اعظم، اسٹیچو آف ایکویلٹی کے چاروں طرف موجود 108 دِویہ دیشم (خوبصورتی سے کندہ کیے گئے منادر) سے ملتی جلتی تعمیرات کا بھی دورہ کریں گے۔
شری رامانوجاچاریہ نے قومیت، صنف، نسل، ذات یا مسلک کی پرواہ کیے بغیر، ہر انسان کو برابر سمجھتے ہوئے زندگی بھر ان کی فلاح و بہبود کے لیے کام کیا۔ اس وقت شری رامانوجاچاریہ کی 1000ویں سالگرہ منائی جا رہی ہے، اور اسٹیچو آف ایکویلٹی کی نقاب کشائی 12 روزہ شری رامانوجاچاریہ سہسرابدی سماروہم کا ایک حصہ ہے۔
اس دورہ میں، وزیر اعظم آئی سی آر آئی ایس اے ٹی کی 50 سالہ تقریبات کا آغاز کریں گے۔ وزیر اعظم آئی سی آر آئی ایس اے ٹی کی پودوں کے تحفظ پر مبنی ماحولیاتی تبدیلی تحقیقی فیسلیٹی اور آئی سی آر آئی ایس اے ٹی کی ریپڈ جنریشن ایڈوانس منٹ فیسلیٹی کا بھی افتتاح کریں گے۔ یہ دونوں ادارے ایشیا اور سب صحارا افریقہ کے چھوٹے کسانوں کے لیے وقف ہیں۔ وزیر اعظم آئی سی آر آئی ایس اے ٹی کے مخصوص طریقے سے ڈیزائن کردہ لوگو کی بھی رونمائی کریں گے اور اس موقع پر ایک یادگاری ٹکٹ جاری کریں گے۔
آئی سی آر آئی ایس اے ٹی ایک بین الاقوامی تنظیم ہے جو ایشیا اور سب صحارائی افریقہ کی ترقی کے لیے زرعی تحقیق کراتی ہے۔ یہ فصلوں کی بہتر اقسام اور ہائبرڈ کی فراہمی کے ذریعے کسانوں کی مدد کرتی ہے اور ماحولیاتی تبدیلی سے لڑنے میں خشک علاقوں کے چھوٹے کسانوں کی بھی مدد کرتی ہے۔
